საჯარო ლექციების ციკლი საქართველოს დავით აღმაშენებლის სახელობის უნივერსიტეტში!
მაისი 20, 2026 2026-05-20 14:17საჯარო ლექციების ციკლი საქართველოს დავით აღმაშენებლის სახელობის უნივერსიტეტში!
2026 წლის 10 და 17 მაისს, საქართველოს დავით აღმაშენებლის სახელობის უნივერსიტეტში, თომას ჯეფერსონის კვლევით ცენტრთან თანამშრომლობითა და ერთობლივი ორგანიზებით მიმდინარე „გლობალური ლიდერობისა და განვითარების სამიტის“ ფარგლებში გაიმართა პროფესორ ლევან დუნდუა-სა და ინოლა ღონღაძე-ს საჯარო შეხვედრები თემებზე: „ბრენდინგი და AI“ და „მონაცემებიდან გადაწყვეტილებამდე: KPI და ანალიტიკა“.
10 მაისს გამართულ შეხვედრაზე პროფესორმა ლევან დუნდუამ ისაუბრა თანამედროვე ციფრულ ეპოქაში ბრენდინგის ტრანსფორმაციასა და ხელოვნური ინტელექტის გავლენაზე მარკეტინგისა და კომუნიკაციის პროცესებში. განხილულ იქნა AI ტექნოლოგიების როლი ბრენდის იდენტობის ფორმირებაში, მომხმარებელთან ურთიერთობის თანამედროვე მიდგომები და ის შესაძლებლობები, რომელსაც ხელოვნური ინტელექტი ორგანიზაციებსა და ბიზნესს სთავაზობს. სპიკერმა განსაკუთრებული ყურადღება გაამახვილა ციფრული პლატფორმების სწრაფ განვითარებასა და იმ გამოწვევებზე, რომლებიც თანამედროვე ბრენდებს კონკურენტულ გარემოში ხვდებათ. შეხვედრისას ასევე გამოიკვეთა მონაცემებზე დაფუძნებული სტრატეგიების მნიშვნელობა და AI ინსტრუმენტების პრაქტიკული გამოყენების პერსპექტივები.
17 მაისს გამართული შეხვედრა დაეთმო მონაცემებზე დაფუძნებული გადაწყვეტილებების მნიშვნელობასა და KPI სისტემების როლს ეფექტური მართვის პროცესში. ინოლა ღონღაძემ მონაწილეებს გააცნო ანალიტიკური ინსტრუმენტების გამოყენების პრაქტიკული ასპექტები, მონაცემთა ინტერპრეტაციის თანამედროვე მიდგომები და ის მექანიზმები, რომლებიც ორგანიზაციებს სტრატეგიული გადაწყვეტილებების მიღებაში ეხმარება. სპიკერმა ასევე ისაუბრა ანალიტიკის მნიშვნელობაზე სწრაფად ცვალებად პროფესიულ გარემოში და აღნიშნა, რომ სწორი მონაცემების დამუშავება და შეფასება თანამედროვე ლიდერობის ერთ-ერთ მნიშვნელოვან კომპონენტად იქცა. შეხვედრის ფარგლებში განხილულ იქნა KPI ინდიკატორების ეფექტიანი გამოყენების პრაქტიკული მაგალითები და მათი გავლენა ორგანიზაციულ განვითარებაზე.
ორივე ღონისძიების მეორე ნაწილი დისკუსიის ფორმატში წარიმართა, მონაწილეებს შესაძლებლობა ჰქონდათ, დაესვათ კითხვები სპიკერებისთვის, გაეზიარებინათ საკუთარი მოსაზრებები და ემსჯელათ თანამედროვე ლიდერობის, ანალიტიკის, ბრენდინგისა და ხელოვნური ინტელექტის განვითარების თანამედროვე ტენდენციებზე.
