უნივერსიტეტის ბიბლიოთეკით სარგებლობა შესაძლებელია გაწევრიანების შემდეგ.

ბიბლიოთეკარი გაწევრიანების მსურველს წარმოდგენილი დოკუმენტაციის საფუძველზე არეგისტრირებს მკითხველად და ავსებს ელექტრონულ ფორმულარს, სადაც შეაქვს სახელი და გვარი, პირადი ნომერი, მისამართი, ტელეფონი, ელექტრონული ფოსტა, სემესტრი და სკოლა.

აკადემიური, მოწვეული და ადმინისტრაციული პერსონალის რეგისტრირება ხდება პირადობის დამადასტურებელი დოკუმენტისა და საკონტაქტო მონაცემების საფუძველზე. მონაცემების ცვლილების შემთხვევაში მკითხველი ვალდებულია აცნობოს ბიბლიოთეკას.

მკითხველს შეუძლია ისარგებლოს უნივერსიტეტის ბიბლიოთეკის კოლექციებით, სამკითხველო და კომპიუტერული დარბაზებით, ჯგუფური და ინდივიდუალური მუშაობის ოთახებით, ელექტრონული ბიბლიოთეკით, აუდიო-ვიდეო მასალებითა და სამეცნიერო ელექტრონულ ბაზებზე უფასო წვდომით.

აკადემიურ, მოწვეულ, ადმინისტრაციულ პერსონალსა და სტუდენტებს ელექტრონულ მასალებზე წვდომა შეუძლიათ უნივერსიტეტის სასწავლო პროცესის ელექტრონული მართვის სისტემის — emis.sdasu.edu.ge — მეშვეობით.

საბიბლიოთეკო რესურსით სარგებლობისას მკითხველმა უნდა წარმოადგინოს პირადობის დამადასტურებელი მოწმობა ან უნივერსიტეტის მიერ გაცემული სტუდენტური ბილეთი.

სასურველი მასალის მოძიება შესაძლებელია უნივერსიტეტის ვებგვერდზე განთავსებულ ბიბლიოთეკის კატალოგში ან უშუალოდ ბიბლიოთეკართან.

მასალის შეკვეთა შესაძლებელია პირადად ან ელექტრონული ფოსტის საშუალებით. ბიბლიოთეკარი აცნობებს მკითხველს, ხელმისაწვდომია თუ არა მასალა, შესაძლებელია თუ არა მისი სახლში გატანა და რა ვადით.

თუ კონკრეტული მასალა არ არის ხელმისაწვდომი, ბიბლიოთეკარი სთავაზობს ალტერნატიულ რესურსს. სასურველი მასალის წინასწარ დაჯავშნაც შესაძლებელია.

ერთი ეგზემპლარით წარმოდგენილი ბეჭდური ერთეული, გამონაკლისის გარდა, ბიბლიოთეკიდან არ გაიცემა და გამოიყენება მხოლოდ სამკითხველო დარბაზში. თუ მასალაზე ყოველდღიური მოთხოვნა არ არსებობს, შესაძლებელია მისი დროებით გატანა.

ბიბლიოთეკიდან არ გაიცემა პერიოდული გამოცემები, ლექსიკონები და ენციკლოპედიები.

წიგნის გატანის უფლებით სარგებლობენ სტუდენტები, აკადემიური, მოწვეული და ადმინისტრაციული პერსონალი. მკითხველი ვალდებულია წიგნი დროულად დააბრუნოს.

თუ აქტიურად მოხმარებად წიგნს სხვა მკითხველი ითხოვს, მომხმარებელი ვალდებულია ბიბლიოთეკარის წერილობითი შეტყობინების მიღებიდან არაუმეტეს 48 საათისა დააბრუნოს მასალა. ვადის გაგრძელება შესაძლებელია მხოლოდ მაშინ, თუ წიგნზე მოთხოვნა არ არსებობს.

მკითხველს უფლება აქვს ერთდროულად გაიტანოს მაქსიმუმ 5 წიგნი.

დაბრუნების ვადის დადგომისთანავე მასალა უნდა დაბრუნდეს ბიბლიოთეკაში. ვადის გაგრძელება შესაძლებელია მხოლოდ მაშინ, თუ მასალაზე მოთხოვნა არ არსებობს.

თუ მკითხველი ობიექტური მიზეზით — ავადმყოფობა, ქვეყანაში არყოფნა და სხვა — ვერ აბრუნებს მასალას დროულად, ვალდებულია წინასწარ აცნობოს ბიბლიოთეკას. წინააღმდეგ შემთხვევაში ვადა ჩაითვლება დარღვეულად.

ვადის დარღვევის შემთხვევაში მკითხველს შეიძლება შეეზღუდოს მასალის ბიბლიოთეკის ფარგლებს გარეთ გატანა. შეზღუდვა უნდა იყოს დასაბუთებული და წინასწარ ცნობილი.

ბიბლიოთეკარი აგზავნის გაფრთხილებას წიგნის დაბრუნების ვადის გასვლის, აქტიურად მოთხოვნადი წიგნის სხვა მკითხველის მიერ მოთხოვნისა და ქცევის წესების დარღვევის შემთხვევაში.

ვადის გასვლიდან ერთი დღის შემდეგ შესაძლებელია ხელმეორე გაფრთხილება. შეტყობინების მიუღებლობა მკითხველს არ ათავისუფლებს ვალდებულებებისგან.

ბიბლიოთეკის საქმიანობის, სამუშაო განრიგის, მასალის ხელმისაწვდომობისა და გატანის ვადების შესახებ ინფორმაციის მისაღებად მკითხველს შეუძლია მიმართოს ბიბლიოთეკარს პირადად, ელფოსტით, ტელეფონით ან სხვა საკომუნიკაციო საშუალებით. პასუხი გაიცემა არაუმეტეს 2 სამუშაო დღისა.

ბიბლიოთეკის ყველა წევრს აქვს ინფორმაციულ-საკომუნიკაციო ტექნოლოგიებით სარგებლობის უფლება. კომპიუტერი, ინტერნეტი და Wi‑Fi უფასოა.

გამოყენების შემდეგ კომპიუტერი ჩართული უნდა დარჩეს. მომხმარებელი ვალდებულია გაუფრთხილდეს ტექნიკას და არ აქვს პროგრამული ფაილების ჩაწერის ან წაშლის უფლება.

დაუშვებელია კომპიუტერის არადანიშნულებისამებრ გამოყენება, მათ შორის თამაშებისა და გასართობი ვებგვერდებისთვის. ხარვეზის შემთხვევაში მომხმარებელმა უნდა მიმართოს ბიბლიოთეკარს და თვითნებურად არ სცადოს შეკეთება.

სხვა მომხმარებლების მოთხოვნის შემთხვევაში კომპიუტერით სარგებლობის ლიმიტი შეადგენს 60 წუთს.

მკითხველს შეუძლია ისარგებლოს სასწავლო და კვლევითი მასალის ასლის გადაღებისა და ამობეჭდვის სერვისით.

ბიბლიოთეკაში არსებული ლიტერატურის ასლის გადაღება ან კომპიუტერიდან ინფორმაციის ამობეჭდვა თვითნებურად დაუშვებელია. მომსახურებისთვის საჭიროა ბიბლიოთეკარისადმი მიმართვა.

მკითხველი ვალდებულია პატივი სცეს ბიბლიოთეკის თანამშრომლებსა და სხვა მომხმარებლებს, გაუფრთხილდეს მატერიალურ-ტექნიკურ ბაზას და არ დააზიანოს ინვენტარი.

ბიბლიოთეკაში შესვლისთანავე მობილური ტელეფონი უნდა გადაიყვანოს უხმო რეჟიმზე, დაიცვას სიჩუმე და ჯგუფური მუშაობისას ხელი არ შეუშალოს სხვებს.

გამოყენებული საბიბლიოთეკო რესურსი თვითნებურად არ უნდა დაბრუნდეს თაროზე — ის უნდა ჩაბარდეს ბიბლიოთეკარს ან დარჩეს მაგიდაზე.

მასალის მიღებისას მკითხველმა უნდა შეამოწმოს მისი მდგომარეობა და დეფექტის აღმოჩენის შემთხვევაში აცნობოს თანამშრომელს.

ბიბლიოთეკაში საკვების შეტანა დაუშვებელია, გარდა ბოთლში ჩამოსხმული წყლისა და სხვა მინერალური სასმელებისა.