საქართველოს დავით აღმაშენებლის სახელობის უნივერსიტეტში, ჰუმანიტარულ მეცნიერებათა აკადემია „აველუმის“ ორგანიზებით გაიმართა ღონისძიება თემაზე: „ინკლუზიური განათლება: სწავლების ინოვაციური მეთოდები“.
ღონისძიების მიზანს ინკლუზიური განათლების შესახებ საზოგადოების ცნობიერების ამაღლება, სწავლების თანამედროვე და ინოვაციური მეთოდების პოპულარიზაცია, საგანმანათლებლო სფეროს წარმომადგენელთა გამოცდილების გაზიარება და თითოეული მოსწავლის საჭიროებებსა და შესაძლებლობებზე მორგებული სწავლების მნიშვნელობის წარმოჩენა წარმოადგენდა.
ღონისძიებაში მონაწილეობდნენ სხვადასხვა სკოლის მოსწავლეები და მასწავლებლები, მათ შორის საქართველოს სხვადასხვა მუნიციპალიტეტიდან და რეგიონიდან. შეხვედრამ გააერთიანა განათლების სფეროთი დაინტერესებული პირები, რომელთაც შესაძლებლობა ჰქონდათ, ემსჯელათ ინკლუზიური განათლების აქტუალურ საკითხებზე, გაეზიარებინათ საკუთარი გამოცდილება და წარმოეჩინათ სწავლების პროცესში გამოყენებული მიდგომები.
ღონისძიების ფარგლებში ყურადღება გამახვილდა ინკლუზიური განათლების თანამედროვე გამოწვევებზე, ბავშვის ინდივიდუალური საჭიროებების გათვალისწინებაზე, ფსიქოლოგის როლზე, მასწავლებლისა და მშობლის თანამშრომლობასა და მოსწავლეთა აქტიური ჩართულობის ხელშეწყობაზე. განსაკუთრებული მნიშვნელობა მიენიჭა სწავლების ინოვაციურ მეთოდებსა და პრაქტიკულ სტრატეგიებს, რომლებიც ხელს უწყობს თითოეული მოსწავლის შესაძლებლობების გამოვლენასა და განვითარებას.
ინიციატივის ფარგლებში ჩატარდა მოსწავლეთა ესეების კონკურსი, რომელშიც X–XII კლასების მოსწავლეები მონაწილეობდნენ. კონკურსის შედეგად გამოვლინდა სამი გამარჯვებული ნაშრომი, რომელთა ავტორებიც დაჯილდოვდნენ სიგელებითა და ჯილდოებით. კონკურსმა მოსწავლეებს შესაძლებლობა მისცა, საკუთარი ხედვები, მოსაზრებები და კვლევითი ინტერესები წარმოეჩინათ ინკლუზიური განათლებისა და საგანმანათლებლო პროცესში თანასწორი შესაძლებლობების უზრუნველყოფის საკითხებზე.
ღონისძიება ხელს უწყობდა მოსწავლეებსა და მასწავლებლებს შორის გამოცდილების გაზიარებას, პროფესიული თანამშრომლობის გაძლიერებასა და ინკლუზიური განათლების საკითხებზე საზოგადოებრივი ინტერესის ზრდას.
საქართველოს დავით აღმაშენებლის სახელობის უნივერსიტეტისთვის მნიშვნელოვანია ისეთი საგანმანათლებლო ინიციატივების მხარდაჭერა, რომლებიც ხელს უწყობს ახალგაზრდების განვითარებას, პედაგოგთა პროფესიულ გაძლიერებასა და განათლების ხარისხის გაუმჯობესებას.
მსგავსი ღონისძიებები ქმნის მნიშვნელოვან შესაძლებლობას სხვადასხვა სკოლისა და რეგიონის წარმომადგენელთა თანამშრომლობისთვის და კიდევ ერთხელ წარმოაჩენს სწავლების ინოვაციური მიდგომების მნიშვნელობას თანამედროვე განათლების სისტემაში.
